Eýranyň öten agşamyň dowamynda Ysraýyla garşy atan raketalarynyň netijesinde ýurduň günortasyndaky Beýer-Şewa şäherinde ýerleşýän iri “Soroka” keselhanasynyň binalar toplumyna zeper ýetdi. Raketa zarbalary Holonda we Ramat-Ganda hem hasaba alyndy. Saglyk işgärleriniň soňky maglumatlaryna görä, onlarça adam ýaralandy, olaryň üçüsiniň ýagdaýy agyr.
Gijeki hüjümde umumylykda 30-dan gowrak raketa atyldy. Ysraýylda birnäçe gezek howa duýduryşy yglan edildi.
Ysraýyl häkimiýetleri Eýrany raýat desgalaryna hüjüm etmekde ýene-de aýyplady. Ysraýylyň goranmak ministri Ysraýel Kats harbylara Eýranyň strategiki maksatly desgalaryna garşy zarbalary güýçlendirmegi buýurdy.
Ysraýylyň harby güýçleri 19-njy iýuna geçilýän gije Eýranyň territoriýasyna birnäçe hüjümi amala aşyrdy. Olaryň arasynda Arak we Natanz şäherindäki ýadro desgalary hem bar.
Taraplaryň arasyndaky birek-birege zarbalar ýedinji gün dowam edýär.